கால்சியம் நிறைந்த முட்டைகோஸ் சட்னி.. வீட்டிலேயே அருமையாக செய்வது எப்படி?..!!

முட்டைகோஸ் மெனோபாஸ் காலங்களில் உண்டாகும் கால்சியம், பாஸ்பரஸ் இழப்பை ஈடுசெய்ய உதவுகிறது. மேலும் மலச்சிக்கல் பிரச்சனையையும் சரிசெய்கிறது. முட்டைக்கோஸில் நார்ச்சத்து அதிகம் உள்ளது.

தேவையான பொருட்கள் :

முட்டைக்கோஸ் - 200 கிராம் 

இஞ்சி - 1/2 இன்ச் 

வெங்காயம் - 1

தக்காளி - 1

கருவேப்பிலை - சிறிதளவு 

பச்சை மிளகாய் - 2

புளி - சிறு துண்டு 

துருவிய தேங்காய் - 4 தேக்கரண்டி 

கடுகு - 2 தேக்கரண்டி 

உளுத்தம் பருப்பு - 2 தேக்கரண்டி

பெருங்காயத்தூள் - 1 சிட்டிகை

வரமிளகாய் - 1

தாளிக்க :

கருவேப்பிலை - சிறிதளவு 

எண்ணெய் - 1 தேக்கரண்டி 

உளுத்தம் பருப்பு - 1 தேக்கரண்டி 

கடுகு - 1/2 தேக்கரண்டி

செய்முறை :

★முதலில் வெங்காயம், தக்காளி, முட்டைகோஸை பொடியாக நறுக்கிக்கொள்ள வேண்டும்.

★ஒரு வானலியை அடுப்பில் வைத்து எண்ணெய் ஊற்றி சூடானதும் கடுகு, வரமிளகாய், உளுத்தம் பருப்பு மற்றும் பெருங்காயத்தூள் சேர்த்து பொன்னிறமாக தாளித்து தனியே எடுத்து வைத்துக்கொள்ளவும்.

★பின் அதே வானலில் வெங்காயம், இஞ்சி, பச்சை மிளகாய், கருவேப்பிலை சேர்த்து பொன்னிறமாக வதக்கும் வரை வதக்கி கொள்ள வேண்டும்.

★அதனுடன் முட்டைக்கோஸ் சேர்த்து பச்சை வாசனை போகும்வரை வதக்கி, தக்காளி சேர்த்து சிறிது நேரம் வதக்க வேண்டும்.

★பின் அதனை மிக்ஸியில் சேர்த்து லேசாக அரைத்து புளிச்சாறு, தேங்காய் மற்றும் உப்பு சேர்த்து அரைக்கவும்.

★இறுதியாக கடாயை அடுப்பில் வைத்து எண்ணெய் ஊற்றி சூடானதும், தாளிக்க கொடுத்துள்ள பொருட்களை சேர்த்து தாளித்து சட்னியில் ஊற்றினால் முட்டைக்கோஸ் சட்னி தயார்.