முதியவரை கத்தியால் குத்திக் கொன்ற இளைஞர் தலைமறைவு... போலீசார் வலைவீச்சு...!

திண்டுக்கல் மாவட்டம் தாடிக்கொம்பு அருகே முதியவரை கத்தியால் குத்திக் கொலை செய்த இளைஞரை காவல்துறையினர் தேடி வருகின்றனர்.

திண்டுக்கல் மாவட்டம் தாடிக்கொம்பு அடுத்த உலகம்பட்டியார் தோட்டம் பகுதியில் வசித்து வருபவர் விவசாயி ராயப்பன் (65). இவர் நேற்று தனது விவசாய தோட்டத்தில் உள்ள கிணற்றில் துணி துவைத்து கொண்டிருந்தார். 

அப்போது அவரது வீட்டின் அருகில் வசிக்கும் உறவினரான செபாஸ்தியனின் மகன் வின்சென்ட் (28) அவரது வளர்ப்பு நாயுடன் அங்கு வந்துள்ளார். இதை பார்த்து ராயப்பனின் பேரன் பயந்ததால், ராயப்பன் நாயை வெளியே அழைத்துச்செல்லும்படி வின்சென்டிடம் கூறியுள்ளார்.

இது குறித்து ராயப்பனுக்கும், வின்சென்டுக்கும் இடையே தகராறு ஏற்பட்டுள்ளது. அப்போது, அங்கு வந்த வின்சென்டின் தம்பி டேனியல் (25), ராயப்பனை கத்தியால் குத்தியதில், பலத்த காயமடைந்த ராயப்பன் சம்பவ இடத்திலேயே பரிதாபமாக உயிரிழந்தார்.

தகவல் அறிந்து சம்பவ இடத்திற்கு வந்த தாடிக்கொம்பு காவல்துறையினர், உயிரிழந்த ராயப்பனின் உடலை மீட்டு உடற்கூராய்விற்காக திண்டுக்கல் அரசு மருத்துவமனைக்கு அனுப்பி வைத்தனர். காவல்துறையினர் இந்த சம்பவம் குறித்து வழக்குப்பதிவு செய்து, தலைமறைவான டேனியலை தேடி வருகின்றனர்.