தக்காளியை பெட்டியோடு ஆட்டையை போட்ட இளைஞர்.. கொத்தாக தூக்கிய போலீசார்..!

சேலம் அருகே மளிகைக் கடையில் விற்பனைக்கு வைத்திருந்த தக்காளி பெட்டியை திருடிச்சென்ற இளைஞரை மகுடஞ்சாவடி போலீசார் கைது செய்தனர்.

சேலம் மாவட்டம் பெருமாகவுண்டம்பட்டி பகுதியை சேர்ந்தவர் சங்கர். இவர் அதே பகுதியில் மளிகைக் கடை வைத்துள்ளார். கடந்த வியாழக்கிழமை இவரது கடையின் விற்பனைக்காக 60 கிலோ எடையுள்ள 2 கிரேடு தாக்காளி பெட்டிகளை வைத்துள்ளார். சிறிது நேரத்திற்கு பின் வந்து பார்த்தபோது, அவற்றில் ஒரு கிரேடு தக்காளியை கானவில்லை.

இதனால் அதிர்ச்சிக்குள்ளான சங்கர், இதுகுறித்து மகுடஞ்சாவடி காவல் நிலையத்தில் புகார் அளித்தார். அதன் பேரில், காவல்துறையினர் சம்பவ இடத்திற்கு வந்து கடையில் இருந்த சிசிடிவி கேமரா பதிவுகளை ஆய்வு செய்தனர். அப்போது, இருசக்கர வாகனத்தில் வந்த மர்மநபர் ஒருவர் தக்காளி பெட்டியை திருடிச் சென்றது தெரிய வந்தது.

இதனை அடுத்து, இந்த சம்பவம் குறித்து காவல்துறையினர் வழக்குப்பதிவு செய்து விசாரித்து வந்தனர்.போலீசாரின் விசாரணையில், தக்காளியை திருடி சென்றவர், வெண்ணந்துர் தங்கசாலை பகுதியை சேர்ந்த சின்ராஜ் (32) என்பது தெரிய வந்தது. மேலும், இவர் செவ்வாய்பேட்டை பகுதியில் ஆப்பிள் பெட்டி திருடிய வழக்கில் கைதாகி சிறையில் இருந்த நிலையில், சமீபத்தில் ஜாமினில் வெளியே வந்துள்ளார். இதனை அடுத்து, சின்ராஜை கைது செய்த காவல்துறையினர், அவரை நீதிமன்றத்தில் ஆஜர்படுத்தி சிறையில் அடைத்தனர்.